മലപ്പുറം: മലപ്പുറം കാളികാവ് ചോക്കാട് മരുതങ്കാട് അയ്യപ്പ ക്ഷേത്രത്തിലെ മോഷണം പോയ ഭണ്ഡാരം പൂട്ട് തകര്‍ത്ത നിലയില്‍ കണ്ടെത്തി. ക്ഷേത്രത്തിന് സമീപത്തെ സ്വകാര്യ വ്യക്തിയുടെ റബ്ബര്‍ തോട്ടത്തില്‍ കുറ്റിക്കാട്ടില്‍ ഉപേക്ഷിച്ച നിലയിലായിരുന്നു ഭണ്ഡാരം കാണപ്പെട്ടത്. കാളികാവ് സി ഐ. എം ശശിധരന്‍ പിള്ളയുടെ നേതൃത്വത്തില്‍ നടത്തിയ തിരച്ചിലിലാണ് ഭണ്ഡാരം കണ്ടെത്തിയത്.
ഭണ്ഡാരം തകര്‍ക്കാന്‍ ഉപയോഗിച്ച ചുറ്റികയും കുത്തുളിയും സമീപത്ത് നിന്ന് കണ്ടെടുക്കുകയും ചെയ്തു. ഭണ്ഡാരം കണ്ടെത്തിയതോടെ ഫോറന്‍സിക്ക് സംഘവും, ഡോഗ് സ്‌കോഡും സ്ഥലത്തെത്തി. ചുറ്റികയുടെയും ഉളിയുടേയും മണം പിടിച്ച് ഓടിയ പോലീസ് നായ നിര്‍മാണം നടക്കുന്ന വീടിന് സമീപത്താണ് ചെന്നു നിന്നത്. ഭണ്ഡാരം പൊളിക്കാന്‍ ഉപയോഗിച്ച ആയുധങ്ങള്‍ നിര്‍മാണ സ്ഥലത്ത് നിന്ന് എടുത്തതാകാമെന്നാണ് നിഗമനം. ക്ഷേത്രത്തിന്റെ നടപ്പന്തലില്‍ വെച്ച സ്റ്റീല്‍ ഭണ്ഡാരം ശനിയാഴ്ച രാവിലെയാണ് കാണാതായത് ശ്രദ്ധയില്‍ പെട്ടത്. മൂന്ന് മാസമായി ഭണ്ഡാരം തുറന്നിട്ടില്ല. പ്രതിഷ്ഠാ ദിനാഘോഷത്തിലെ കാണിക്ക ഉള്‍പ്പെടെ വലിയ തുക ഭണ്ഡാരത്തില്‍ ഉണ്ടാകുമെന്നാണ് ക്ഷേത്ര ഭാരവാഹികളുടെ നിഗമനം. ഭണ്ഡാരവും മറ്റ് തൊണ്ടി സാധനങ്ങളും പോലീസ് സ്റ്റേഷനിലേക്ക് മാറ്റി.
