കൊച്ചി: ആളൊഴിഞ്ഞ പറമ്പിൽ നിന്ന് 40 കിലോ കഞ്ചാവ് ചാക്കില് സൂക്ഷിച്ച നിലയില് കണ്ടെടുത്തു. പച്ചാളം പി.ജെ. ആന്റണി ഗ്രൗണ്ടിനു പിന്നിലായി നിര്മാണം പുരോഗമിക്കുന്ന കെട്ടിടത്തിനു സമീപത്തു നിന്നാണ് കഞ്ചാവ് കണ്ടെടുത്തത്. മയക്കുമരുന്ന് സംഘങ്ങള് ക്രിസ്മസ് പുതുവത്സര ആഘോഷങ്ങള്ക്കായി എത്തിച്ചതാണെന്നാണ് ബന്ധപ്പെട്ട അധികൃതർ നൽകുന്ന സൂചന.
ക്രിസ്മസ് പുതുവത്സര ആഘോഷങ്ങളുടെ മറവില് കൊച്ചിയില് മയക്കുമരുന്ന് പാര്ട്ടികള് സംഘടിപ്പിക്കാന് സാധ്യതയുണ്ടെന്നു രഹസ്യാന്വേഷണ വിഭാഗത്തിന്റെ റിപ്പോര്ട്ട് വന്നതിനാൽ സിറ്റി പൊലീസ് നിരീക്ഷണം ശക്തമാക്കിയിരുന്നു.
സംഭവത്തെക്കുറിച്ചു വിശദമായ അന്വേഷണം നടക്കുന്നുണ്ടെന്ന് എറണാകുളം ടൗണ് നോര്ത്ത് പൊലീസ് ഇന്സ്പെക്ടര് പ്രശാന്ത് ക്ലിന്റ് വ്യക്തമാക്കി.