മലപ്പുറം: വിഷുബംബര്‍ 12കോടി അടിച്ച ഭാഗ്യവാന് മലപ്പുറം ചെമ്മാട്ടുകാരനെന്ന് സൂചന. ചെമ്മാട്ടെ ബസറ്റാന്റിലെ സി.കെ.വി ലോട്ടറിക്കടയില്‍നിന്നും വിറ്റ ടിക്കറ്റിനാണു കേരള സംസ്ഥാന ഭാഗ്യക്കുറി വകുപ്പിന്റെ വിഷു ബമ്പര്‍ ഒന്നാം സമ്മാനമായ 12 കോടിരൂപ അടിച്ചതെന്നു സ്ഥിരീകരിച്ചു. തിരൂര്‍ ട്രഷറിയില്‍നിന്നും സി.കെ.വി ലോട്ടറി ഏജന്റ്സി വാങ്ങിയ ടിക്കറ്റിനാണ് ഒന്നാം സമ്മാനമെന്ന വാര്‍ത്ത പരന്നതോടെ ഒന്നാംസ്ഥാനക്കാരനെ തേടുകയായിരുന്നു ഏജന്‍സികള്‍. എന്നാല്‍ സി.കെ.വി ലോട്ടറിക്കു ഏഴു ഏജന്‍സികളുണ്ട്. ഹെഡ് ഓഫീസ് പ്രവര്‍ത്തിക്കുന്ന താനൂരില്‍ രണ്ടും, തിരൂര്‍, കുറ്റിപ്പുറം, ചെമ്മാട്, വൈലത്തൂര്‍, കോഴിക്കാട് എന്നിവിടങ്ങളിലാണു ലോട്ടറിയുടെ ഏജന്‍സികള്‍ പ്രവര്‍ത്തിക്കുന്നത്. ഇതില്‍ ചെമ്മാടുവിറ്റ ടിക്കറ്റിനാണു ഒന്നാം സമ്മാനം അടിച്ചതെന്നു ഏജന്‍സി ഉടമ ആദര്‍ശ് പറഞ്ഞു. റീട്ടെയിലായി വിറ്റതിനാല്‍ തന്നെ ഏകദേശം ടിക്കറ്റ് വിറ്റ സമയവും മറ്റു പരിശോധിച്ച ഉടമയെ കണ്ടെത്താനുള്ള ശ്രമത്തിാണു ഏജന്‍സിക്കാരും. ആദര്‍ശിന്റെ ഏജന്‍സിയിലൂടെ വിറ്റ ലോട്ടറിയായതിനാല്‍ തന്നെ 12 കോടിയുടെ 10ശതമാനമായ 1.2 കോടി രൂപ ആദര്‍ശിനും ലഭിക്കും. ഏഴു ലോട്ടറി ഏജന്‍സികളുണ്ടെങ്കിലും ഇതുവരെ സി.കെ.വി ലോട്ടറിക്കടകളില്‍നിന്നും ആര്‍ക്കും ഒന്നാം സമ്മാനം അടിച്ചിട്ടില്ല. ഇത് ബംബര്‍ സമ്മാനം തന്നെ അടിച്ചതിലുള്ള സന്തോഷത്തിലാണ് ഏജന്‍സി ഉടമകളും ജീവനക്കാരും. നേരത്തെ രണ്ടു തവണ രണ്ടാംസമ്മാനവും ഒരു തവണ മൂന്നാംസമ്മാനവും സി.കെ.വി ലോട്ടറിയില്‍നിന്നും അടിച്ചിട്ടുണ്ട്.
ആദര്‍ശ് സി.കെ (Agency no..m5087) എന്ന ഏജന്റില്‍ നിന്നുമാണ് ടിക്കറ്റ് വിറ്റ് പോയിരിക്കുന്നത്. VE 475588 എന്ന നമ്പറിനാണ് ഒന്നാം സമ്മാനമായ 12 കോടി ലഭിച്ചിരിക്കുന്നത്.
VA 513003 VB 678985 VC 743934 VD 175757 VE 797565 VG 642218 എന്നീ നമ്പറുകള്‍ക്ക് രണ്ടാം സമ്മാനം ലഭിച്ചപ്പോള്‍, VA 214064 VB 770679 VC 584088 VD 265117 VE 244099 VG 412997 എന്നിവയ്ക്കാണ് മൂന്നാം സമ്മാനം ലഭിച്ചത്. ബമ്പറിന്റെ രണ്ടാം സമ്മാനം ഒരു കോടി വീതം ആറ് പേര്‍ക്ക് ലഭിക്കും. മൂന്നാം സമ്മാനമായ പത്ത് ലക്ഷം ആറ് പേര്‍ക്ക് വീതം ലഭിക്കും. നാലാം സമ്മാനം അഞ്ച് ലക്ഷം രൂപയും അഞ്ചാം സമ്മാനം രണ്ട് ലക്ഷം രൂപയുമാണ്. ആറാം സമ്മാനം 5,000 രൂപയും ഏഴാം സമ്മാനം 2,000 രൂപയും എട്ടാം സമ്മാനം ആയിരം രൂപയും 9-ാം സമ്മാനം 500 രൂപയും പത്താം സമ്മാനം 300 രൂപയുമാണ്. കൂടാതെ 500 മുതല്‍ ഒരുലക്ഷം രൂപ വരെയുള്ള മറ്റ് സമ്മാനങ്ങളുമുണ്ട്.
കഴിഞ്ഞ വര്‍ഷത്തെ വിഷു ബംപര്‍ അടിച്ചത് കന്യാകുമാരിക്കടുത്ത് മണവാളക്കുറിച്ചി സ്വദേശികളായ രമേശന്‍, ഡോക്ടര്‍ പ്രദീപ് എന്നിവര്‍ക്കാണ്. 10 കോടി ആയിരുന്നു ഒന്നാം സമ്മാനം. നികുതി കഴിച്ച് 6 കോടി 16 ലക്ഷം രൂപയാണ് ഇവര്‍ക്ക് ലഭിച്ചത്.
