കാളികാവ് : മലപ്പുറത്ത് പീഡനകേസ് പ്രതിയെ നാടുകടത്താൻ ഉത്തരവ്. പ്രായപൂര്‍ത്തിയാകാത്ത പെണ്‍കുട്ടികളെ പ്രണയം നടിച്ചും മൊബൈല്‍ ഫോണും മിഠായിയും പാരിതോഷികമായി നല്‍കി വശീകരിച്ചും തട്ടിക്കൊണ്ടുപോയി ലൈംഗികമായി പീഡിപ്പിച്ചതിന് മൂന്നു കേസുകളില്‍ ഉള്‍പ്പെട്ടതിന്റെ അടിസ്ഥാനത്തിലാണ് ചെങ്കൊടി തൊണ്ടിയിൽ വി. സുഫൈലിന് എതിരെ നാടുകടത്തലിന് ഉത്തരവിട്ടത്. സാമൂഹിക വിരുദ്ധ പ്രവർത്തനങ്ങൾ തടയൽ നിയമപ്രകാരമാണ് ജില്ലാ പോലീസ് മേധാവിയുടെ സ്‌പെഷ്യൽ റിപ്പോർട് പ്രകാരം തൃശൂർ മേഖല ഡെപ്യൂട്ടി പോലീസ് ഇൻസ്‌പെക്ടർ ഉത്തരവിറക്കിയത്.
ഒരു വർഷം മലപ്പുറം ജില്ലയിൽ പ്രവേശിക്കുന്നതിനാണ് വിലക്ക്. ജില്ലാ പോലീസ് മേധാവിയുടെ മുൻ‌കൂർ അനുമതിയുണ്ടെങ്കിൽ മാത്രമേ ജില്ലയിൽ പ്രവേശിക്കാനാവൂ. പ്രതി മലപ്പുറം ജില്ലയില്‍ പ്രവേശിക്കുന്നത് ശ്രദ്ധയില്‍പെട്ടാല്‍ അടുത്തുള്ള പൊലീസ് സ്റ്റേഷനിലോ കാളികാവ് പൊലീസ് സ്റ്റേഷനിലോ (04931- 257222, 9497947290) ജില്ല സ്‌പെഷല്‍ ബ്രാഞ്ച് ഓഫിസിലോ (04832734993) അറിയിക്കണമെന്നും ജില്ലയില്‍ സ്ഥിരമായി കുറ്റകൃത്യങ്ങളില്‍ ഉള്‍പ്പെടുന്നവരെ നിരീക്ഷിച്ചുവരുകയാണെന്നും അവര്‍ക്കെതിരെയും കാപ്പ നിയമം നടപ്പാക്കാന്‍ റിപ്പോര്‍ട്ട് സമര്‍പ്പിക്കുമെന്നും ജില്ല പൊലീസ് മേധാവി അറിയിച്ചു.
