തിരുവനന്തപുരം : സംസ്ഥാനത്ത് 12 മുതല് 14 വയസുവരെയുള്ള കുട്ടികളുടെ കൊവിഡ് വാക്സിനേഷന് ഇന്ന് മുതൽ ആരംഭിച്ചു. തെരഞ്ഞെടുക്കപ്പെട്ട കേന്ദ്രങ്ങളിലായിരിക്കും വാക്സിനേഷന്. വിദ്യാഭ്യാസ വകുപ്പുമായി ആലോചിച്ച് വാക്സിനേഷന് എല്ലാവരിലും എത്തിക്കാനുള്ള ക്രമീകരണം ഏര്പ്പെടുത്തുമെന്ന് അറിയിച്ചിട്ടുണ്ട്. രക്ഷിതാക്കളുടെ ആശങ്ക മനസിലാക്കി കൃത്യമായ ആസൂത്രണം നടത്തിയായിരിക്കും വാക്സിനേഷന് നടത്തുക.
മുതിര്ന്നവര്ക്ക് കോവിഷീല്ഡും, കോവാക്സിനും 15 മുതല് 17 വയസുവരെയുള്ളവര്ക്ക് കോവാക്സിനും 12 മുതല് 14 വയസുവരെയുള്ള കുട്ടികൾക്ക് കോര്ബിവാക്സുമാണ് നൽകുക. 2010 മാര്ച്ച് 16ന് മുമ്പ് ജനിച്ച കുട്ടികള്ക്ക് വാക്സിനെടുക്കാന് സാധിക്കും.
ഓണ്ലൈന് വഴിയും സ്പോട്ട് രജിസ്ട്രേഷന് വഴിയും കുട്ടികള്ക്ക് വാക്സിന് സ്വീകരിക്കാൻ പറ്റും. ഇന്ന് മുതല് 60 വയസിന് മുകളില് പ്രായമുള്ള എല്ലാവര്ക്കും രണ്ടാം ഡോസ് കഴിഞ്ഞ് 9 മാസത്തിന് ശേഷം കരുതല് ഡോസ് എടുക്കാവുന്നതാണ്.