കൊച്ചി :നിര്‍ധന വിദ്യാര്‍ഥികള്‍ക്കു സര്‍ക്കാര്‍ പദ്ധതി പ്രകാരം സൗജന്യ വിദ്യാഭ്യാസം നല്‍കുന്ന എയിംഫില്‍ ഇന്‍റര്‍നാഷണല്‍ എന്ന സ്ഥാപനത്തിന്‍റെ ഹോസ്റ്റലിലുണ്ടായ ഭക്ഷ്യവിഷബാധയെത്തുടർന്ന് എട്ട് വിദ്യാർത്ഥിനികൾ ചികിത്സയിൽ. ഛർദിയും വയറിളക്കവുമാണ് കുട്ടികൾക്ക് ഉണ്ടായത്. ഒരു കുട്ടി ചോര ഛർദ്ദിക്കുകയും ചെയ്തിരുന്നു.
വൃത്തിഹീനമായ സാഹചര്യത്തില്‍ തയാറാക്കിയ പഴകിയ ഭക്ഷണമാണ് തങ്ങള്‍ക്കു നല്‍കിയതെന്നും അതുകൊണ്ടാണ് ഇത്തരത്തിൽ സംഭവിച്ചതെന്നും കുട്ടികൾ ആരോപിച്ചു. പരാതിയുടെ അടിസ്ഥാനത്തിൽ സ്ഥാപനത്തിനെതിരെ പാലാരിവട്ടം പോലീസ് കേസെടുത്തു.
ദീന്‍ ദയാല്‍ ഉപാധ്യായ കല്യാണ്‍ യോജന പ്രകാരം നിര്‍ധന വിദ്യാര്‍ഥികള്‍ക്ക് സൗജന്യ വിദ്യാഭ്യാസം നല്‍കുന്ന എയിംഫില്‍ ഇന്‍റര്‍നാഷണല്‍ സ്ഥാപനം പാലാരിവട്ടത്താണ് സ്ഥിതി ചെയ്യുന്നത്.
