കുറ്റിപ്പുറം: വിദ്യാര്ഥികള്ക്ക് കഞ്ചാവ് വിതരണം ചെയ്യുന്ന മൂന്ന് പേരെ കുറ്റിപ്പുറം പൊലീസ് പിടികൂടി. കുറ്റിപ്പുറം മൂടാല് ഭാഗത്തുനിന്ന് തൃപ്രങ്ങോട് ബീരാന്ചിറ സ്വദേശി താമരത്ത് വിഷ്ണു (22), പാണ്ടികശാല ഞായംകോട്ടില് ഷറഫുദ്ദീന് (29), കുറ്റിപ്പുറം ബസ് സ്റ്റാന്ഡ് പരിസരത്തുനിന്ന് ചേകനൂര് സ്വദേശി കുന്നത്ത് സിറാജ് (19) എന്നിവരാണ് പോലീസിന്റെ പിടിയിലായത്.
വിദ്യാഭ്യാസ സ്ഥാപനങ്ങള് തുറന്നതോടെ കുട്ടികള്ക്ക് ലഹരിവിതരണം ചെയ്യുന്ന സംഘങ്ങളും സജീവമാണെന്ന വിവരത്തെത്തുടർന്ന് പൊലീസ് നടത്തിയ നിരീക്ഷണത്തിലാണ് സ്റ്റേഷന് പരിധിയിലെ വിവിധ ഭാഗങ്ങളില്നിന്ന് പ്രതികളെ പിടികൂടിയത്.
എസ്.ഐ നിഖില് എസ്.സി.പി.ഒ ജയപ്രകാശ്, നിഷാദ്, അലക്സ് എന്നിവരടങ്ങിയ സംഘമാണ് പ്രതികളെ കസ്റ്റഡിയിലെടുത്തത്. പ്രതികളുടെ ഉപഭോക്താക്കളായ വിദ്യാര്ഥികളെ രക്ഷിതാക്കളെ വിളിച്ചുവരുത്തി ലഹരിമുക്തി ചികിത്സക്ക് അയച്ചു.