തിരുവനന്തപുരം: ക്ഷേത്രത്തില്‍ മോഷണം നടത്തുന്ന സിസിടിവി ദൃശ്യങ്ങള്‍ വിദേശത്തിരുന്ന് തത്സമയം കണ്ട പ്രവാസി ഉടനെ പൊലീസിനെ വിവരമറിയിച്ചതിനെ തുടര്‍ന്ന് മോഷ്ടാവിനെ പിടികൂടി. ഇന്നലെ അർദ്ധരാത്രി തുമ്പ കുഞ്ചാലുംമൂട് ദുര്‍ഗാദേവി ക്ഷേത്രത്തില്‍ മോഷണം നടത്തുന്നതിനിടയിലാണ് പൊഴിയൂര്‍ സ്വദേശി അബിന്‍ (22) എന്ന യുവാവിനെ പോലീസ് അറസ്റ്റ് ചെയ്തത്.
പ്രതി ക്ഷേത്രത്തിലെ ശ്രീകോവില്‍ തകര്‍ത്ത ശേഷം കടത്തു കടക്കുകയും വിളക്കുകളും സാധനങ്ങളും മോഷ്ടിക്കുകയും ചെയ്യുന്നത് ക്ഷേത്രത്തിലെ സിസിടിവിയില്‍ പതിഞ്ഞിരുന്നു. ഈ ദൃശ്യങ്ങൾ വിദേശത്തിരുന്ന് ലൈവായി കാണുകയായിരുന്ന പ്രവാസി നാട്ടില്‍ പോലീസിനെ അറിയിക്കുകയും തുടര്‍ന്ന് സ്ഥലത്തെത്തിയ പോലീസ് സംഘം മോഷ്ടാവിനെ അറസ്റ്റ് ചെയ്യുകയുമായിരുന്നു.
തുമ്പ സിഐ. ശിവകുമാര്‍, എസ്‌ഐ. ഇന്‍സാം, സിപിഒമാരായ സുരേഷ്കുമാര്‍, അനില്‍, പ്രസാദ് എന്നിവരുടെ നേതൃത്വത്തിലുള്ള പോലീസ് സംഘമാണ് പ്രതിയെ അറസ്റ്റ് ചെയ്തത്. പ്രതിക്കെതിരെ നിരവധി മോഷണ കേസുകള്‍ നിലവിലുണ്ടെന്ന് പോലീസ് പറഞ്ഞു.
