ശബരിമല : രജനീപടം ജയിലറിൽ ബ്ലാസ്റ്റ് മോഹനായും അല്ലു അർജുനിന്റെ പുഷ്പയിൽ മംഗളം ശ്രീനുവായും മലയാളി പ്രേക്ഷകർക്ക് സുപരിചിതനായ പ്രമുഖ തെലുങ്ക് നടൻ സുനിൽ ശബരിമല ദർശനം നടത്തി. സുഹൃത്തുക്കളോടൊപ്പമാണ് താരം മലചവുട്ടിയത്.ടർബോ എന്ന മമ്മൂട്ടി പടത്തിന്റെ കൊച്ചിയിലെ ലോക്കേഷനിൽ നിന്നും കാർ മാർഗ്ഗമാണ് താരം പമ്പയിലെത്തിയത്. രണ്ടരയോടെ പമ്പയിലെത്തിയ അദ്ദേഹം വൈകീട്ട് അഞ്ചരയോടെ അയ്യപ്പ ദർശനം നടത്തി. ഒരോ തവണയും അയ്യപ്പ ദർശനത്തിലൂടെ തനിക്കു ലഭിക്കുന്ന ഊർജ്ജവും സംതൃപ്തിയും വലുതാണെന്നും ശബരിമല എന്നുമൊരു വിസ്മയമാണെന്നും ദർശന ശേഷം താരം പ്രതികരിച്ചു. മേൽശാന്തിയിൽ പ്രസാദം വാങ്ങിയതിനുശേഷമാണ് മടങ്ങിയത്. ശനിയാഴ്ച പത്മനാഭ സ്വാമി ക്ഷേത്ര ദർശന ശേഷം സുനിൽ പുഷ്പ-2 വിന്റെ ചിത്രീകരണത്തിനായി ഹൈദരാബാദിലേക്ക് തിരിക്കും.
