മലപ്പുറം: പ്രായപൂര്‍ത്തിയാകാത്ത പെണ്‍കുട്ടിയെ നിരവധി തവണ ലൈംഗികമായി അതിക്രമിക്കുകയും ബലാല്‍സംഗത്തിന് ഇരയാക്കുകയും ചെയ്ത കേസില്‍ ആറുമാസമായി വിവിധ സ്ഥലങ്ങളില്‍ ഒളിവില്‍ കഴിഞ്ഞു വരികയായിരുന്ന പ്രതിയെ തമിഴ്‌നാട്ടിലെ ഏര്‍വാടിയില്‍ നിന്നും കോട്ടക്കല്‍ പോലീസ് പിടികൂടി. കോട്ടക്കല്‍ പണിക്കര്‍ക്കുണ്ട് സ്വദേശി വളപ്പില്‍ അബ്ദുല്‍ മജീദിനെ(48)യാണ് മലപ്പുറം ഡി.വൈ.എസ്.പി പി അബ്ദുല്‍ ബഷീറിന്റെ നിര്‍ദ്ദേശപ്രകാരം കോട്ടക്കല്‍ പോലീസ് ഇന്‍സ്‌പെക്ടര്‍ എസ്. അശ്വത്ത് ന്റെ നേതൃത്വത്തിലുള്ള പ്രത്യേക അന്വേഷണസംഘം തമിഴ്‌നാട്ടിലെ ഏര്‍വാടി യില്‍ ഇന്നലെ പിടികൂടിയത്. പ്രതിക്കെതിരെ പോലീസ് കേസെടുത്ത കാര്യം മനസ്സിലാക്കിയാണു മുങ്ങിയിരുന്നത്. തുടര്‍ന്നു പ്രതിയെ തേടി പോലീസ് വിവിധ സ്ഥലങ്ങളില്‍ എത്തിയെങ്കിലും പിടികൂടാന്‍ സാധിച്ചിരുന്നില്ല. എന്നാല്‍ പ്രതി താടിയും മുടിയുമെല്ലാം വളര്‍ത്തി തന്റെ പഴയ രൂപത്തില്‍നിന്നും മാറിയിരുന്നു. തന്നെ തിരിച്ചറിയാതിരിക്കാനായിരുന്നു ഈ വേഷംമാറല്‍. നാട്ടുകാരും ബന്ധുക്കളുമെല്ലാം താന്‍ പീഡനക്കേസില്‍ പ്രതിയായ വിവിരം അറിഞ്ഞതോടെയാണു ആരെങ്കിലും കണ്ടാല്‍ മനസ്സിലാകാതിരിക്കാനായിരുന്നു ഈ വേഷം മാറല്‍.ആദ്യം ചെറിയ കുറ്റത്താടി മാത്രമായിരുന്നു പ്രതിക്കുണ്ടായിരുന്നത്. എന്നാല്‍ പുണ്യസ്ഥലമായി കണക്കാക്കുന്ന ഏര്‍വാടിയില്‍ നിരവധി തീര്‍ഥാടകരെത്തുന്നതിനാല്‍ തന്നെ, തന്നെ ഒരിക്കലും തിരിച്ചറിയില്ലെന്ന വിശ്വാസത്തിലായിരുന്നു പ്രതി. ഭക്ഷണവും മറ്റും അവിടെ സൗജന്യമായി വിതരണം ചെയ്യുന്നതും മറ്റുമാണു കഴിച്ചിരുന്നത്. മുഷിഞ്ഞ വസ്ത്രം ധരിച്ച് തീര്‍ഥാടക സംഘങ്ങളും യാചകരും ഉള്‍പ്പെടെ വിശ്രമിക്കുകയും ഉറങ്ങുകയും ചെയ്യുന്ന പള്ളിയോടനുബന്ധിച്ച സ്ഥലത്താണു പ്രതി അന്തിയുറങ്ങിയിരുന്നതും.
കഴിഞ്ഞ വര്‍ഷം സെപ്റ്റംബറില്‍ ആണ് പെണ്‍കുട്ടിയുടെ പരാതിയില്‍ കോട്ടക്കല്‍ പോലീസ് കേസ് രജിസ്റ്റര്‍ ചെയ്തത്. കേസെടുത്ത വിവരമറിഞ്ഞ പ്രതി ഒളിവില്‍ പോവുകയും വിവിധ സംസ്ഥാനങ്ങളിലായി ഒളിവില്‍ കഴിഞ്ഞു വരികയും ആയിരുന്നു. തുടര്‍ന്ന് മലപ്പുറം ജില്ലാ പോലീസ് മേധാവി എസ് സുജിത്ത് ദാസിന്റെ നിര്‍ദ്ദേശപ്രകാരം പ്രത്യേക അന്വേഷണസംഘം രൂപീകരിക്കുകയും തുറന്ന് നടത്തിയ ശാസ്ത്രീയ അന്വേഷണത്തിലൂടെയാണ് തമിഴ്‌നാട്ടിലെ ഏര്‍വാടിയില്‍ നിന്നും പ്രതിയെ പിടികൂടിയത്. കോട്ടക്കല്‍ അഡിഷണല്‍ എസ്.ഐ രാജന്‍, സീനിയര്‍ സിവില്‍ പോലീസ് ഉദ്യോഗസ്ഥരായ സെബാസ്റ്റ്യന്‍, ഐ.കെ.ദിനേഷ്, ആര്‍.ഷഹേഷ്, കെ.കെ.ജസീര്‍,പി. സലീം എന്നിവരടങ്ങിയ സംഘമാണ് പ്രതിയെ പിടികൂടി കേസന്വേഷണം നടത്തുന്നത്
