മണിമല: വെള്ളാവൂരില് ആറുവയസ്സുകാരനെ രക്ഷിതാക്കള് ക്രൂരമായി മര്ദിച്ചതായി നാട്ടുകാരുടെ പരാതി. സംഭവത്തെതുടര്ന്ന് ചൈല്ഡ്ലൈന് അധികൃതര് കുട്ടിയെ ഏറ്റെടുക്കുകയും ആശുപത്രിയിലാക്കുകയും ചെയ്തു. ഇക്കഴിഞ്ഞ ബുധനാഴ്ച രാത്രിയായിരുന്നു സംഭവം.
അയല്വാസിയുടെ വീട്ടിലെ മോട്ടോര് കേടാക്കിയെന്ന പരാതിയെത്തുടര്ന്ന് രക്ഷിതാക്കള് കുട്ടിയെ വടികൊണ്ട് മര്ദിക്കുകയായിരുന്നു. കുട്ടിയുടെ കരച്ചില്കേട്ട് ഓടിയെത്തിയ അയല്വാസികള് അതിക്രമത്തിൽ നിന്ന് രക്ഷിതാക്കളെ തടയുകയും വിവരം പഞ്ചായത്ത് അംഗത്തെയും വനിത ശിശുക്ഷേമ വകുപ്പ് അധികൃതരെയും അറിയിക്കുകയുമായിരുന്നു.
വ്യാഴാഴ്ച വീട്ടിലെത്തിയ ചൈല്ഡ്ലൈന് അധികൃതര് കുട്ടിയുടെ സംരക്ഷണം ഏറ്റെടുക്കുകയായിരുന്നു. തുടർന്ന് ആശുപത്രിയില് പ്രവേശിപ്പിച്ചപ്പോഴാണ് കുട്ടി ക്രൂരമര്ദനത്തിന് ഇരയായതായി കണ്ടെത്തിയത്. സംഭവത്തില് രക്ഷിതാക്കള്ക്കെതിരെ ശക്തമായ നടപടി സ്വീകരിക്കുമെന്ന് ചൈല്ഡ്ലൈന് അധികൃതര് വ്യക്തമാക്കി.