അനിയത്തിപ്രാവിലെ സുധിയില്‍ നിന്നും നായാട്ടിലെ പ്രവീണ്‍ മൈക്കിളായും പകര്‍ന്നാടുമ്പോള്‍ പ്രായം ചാക്കോച്ചനെ സ്പര്‍ശിക്കുന്നേയില്ലെന്നാണ് ആരാധകര്‍

Breaking News

ഇപ്പോഴും ചെറുപ്പമാണല്ലോ, പ്രായം തോന്നാത്തതു എന്തുകൊണ്ടാണെന്ന ചോദ്യം നിരന്തരം കേള്‍ക്കുന്ന നടനാണ് കുഞ്ചാക്കോ ബോബന്‍. അനിയത്തിപ്രാവിലെ സുധിയില്‍ നിന്നും നിഴലിലെ മജിസ്‌ട്രേറ്റ് ജോണ്‍ ബേബിയായും നായാട്ടിലെ പ്രവീണ്‍ മൈക്കിളായും പകര്‍ന്നാടുമ്പോള്‍ പ്രായം ചാക്കോച്ചനെ സ്പര്‍ശിക്കുന്നേയില്ലെന്നാണ് ആരാധകര്‍ പറയുന്നത്. ഇതിനൊരു മറുപടിയുമായി എത്തുകയാണ് ചാക്കോച്ചന്‍.

പ്രായം കൂടുന്നു എന്ന് പറയുന്നതിനേക്കാള്‍ ചെറുപ്പമാകുന്നു, ചെറുപ്പം കൂടുന്നു എന്ന് പറയിപ്പിക്കാനുള്ള കാര്യങ്ങളാണ് താന്‍ ചെയ്യുന്നതും ചെയ്യാന്‍ ഇഷ്ടപ്പെടുന്നതുമെന്നും കുഞ്ചാക്കോ ബോബന്‍ പറയുന്നു.

മനസിന്റെ സന്തോഷത്തിനും സമാധാനത്തിനുമാണു പണത്തേക്കാളും അംഗീകാരത്തേക്കാളും പ്രാധാന്യം നല്‍കുന്നത്. അതുകൊണ്ടുതന്നെ സമാധാനവും സന്തോഷവും കൂടുതല്‍ എന്റെ മുഖത്തു കാണുമായിരിക്കും. അതൊക്കെ തന്നെയായിരിക്കും ഊര്‍ജ്ജസ്വലതയില്‍ നില്‍ക്കാന്‍ സഹായിക്കുന്നത്.പുതിയ ചെറുപ്പക്കാരുമായും പഴയ ആളുകളുമായും അവരുടെ അനുഭവങ്ങള്‍ അറിയാനും പഠിക്കാനും ശ്രമം നടത്താറുണ്ട്. പുതിയ ആളുകളുടെ ജീവിതവും കാഴ്ചപ്പാടും പഠിക്കാനും എന്റെ ജീവിതത്തില്‍ പകര്‍ത്താനും ശ്രമിക്കാറുണ്ട്. തീര്‍ച്ചയായും പുതിയ ആളുകള്‍ തനിക്ക് പ്രചോദനം പകരാറുണ്ടെന്നും അതൊക്കെയായിരിക്കാം കാരണമെന്നും ചാക്കോച്ചന്‍ പറയുന്നു.