കോവിഡില്‍ മാതാപിതാക്കൾ നഷ്ടപെട്ട കുട്ടികള്‍ക്കായി 10 ലക്ഷം നൽകും: കേന്ദ്രം

India News

കോവിഡ്​ മഹാമാരിയില്‍​ മാതാപിതാക്കളെ നഷ്​ടപ്പെട്ട കുട്ടികളുടെ സംരക്ഷണത്തിനായി കേന്ദ്രസര്‍ക്കാര്‍ പ്രത്യേക പാക്കേജ് പ്രഖ്യാപിച്ചു. ഇതിന്‍റെ ഭാഗമായി 10 ലക്ഷം രൂപ പി.എം കെയേഴ്​സ്​ ഫണ്ടിൽ നിന്നും മാറ്റിവെക്കും. കുട്ടികള്‍ക്ക് 18 വയസ്സ്​​ പൂർത്തിയായാൽ ഈ തുകയിൽ നിന്ന്​ സ്​റ്റൈപ്പൻഡ്​ കൊടുക്കും. 23ാം വയസ്സിൽ തുക പൂർണമായും കുട്ടികൾക്ക്​ കൈമാറുമെന്നും കേന്ദ്രസർക്കാർ പറഞ്ഞു.

പ്രധാനമന്ത്രിയുടെ അധ്യക്ഷതയില്‍ ചേര്‍ന്ന ഉന്നത തല യോഗത്തിലാണ് ഇതുസംബന്ധിച്ച് തീരുമാനമായത്. ആയുഷ്​മാൻ ഭാരത്​ പദ്ധതിയിൽ ഉൾപ്പെടുത്തി അഞ്ചു ലക്ഷം രൂപയുടെ ​ആരോഗ്യ ഇന്‍ഷുറന്‍സും കുട്ടികള്‍ക്ക് നൽകും. പൂർണമായും സൗജന്യ വിദ്യാഭ്യാസവും നല്‍കും. കേന്ദ്രീയ, ​നവോദയ, സൈനിക്​ സ്​കൂളുകളിൽ പഠിക്കാനുള്ള സാഹചര്യമാവും ഒരുക്കുക.

കുട്ടികൾക്ക്​ സ്വകാര്യ സ്​കൂളുകളിലാണ്​ അഡ്​മിഷൻ ലഭിക്കുന്നതെങ്കിൽ ഫീസ് സര്‍ക്കാര്‍ വഹിക്കും. ഉന്നത വിദ്യാഭ്യാസത്തിനായി വായ്​പകൾ നൽകാനും തീരുമാനമായി. വായ്​പ പലിശ കേന്ദ്ര സർക്കാർ വഹിക്കും. വിവിധ സംസ്ഥാന സർക്കാറുകൾ കോവിഡ്​ ബാധിച്ച്​ മാതാപിതാക്കളെ നഷ്​ടപ്പെട്ട കുട്ടികൾക്കായി പാക്കേജുകൾ പ്രഖ്യാപിച്ചിരുന്നു. ഇതിനു പിന്നാലെയാണ്​ കേന്ദ്രസർക്കാറി​ന്‍റെ പ്രഖ്യാപനം.

Leave a Reply

Your email address will not be published.