പെണ്‍കുട്ടിയെ ഉപദ്രവിക്കുന്നത് തടയാന്‍ ശ്രമിച്ചതിന് ബോക്‌സറെ കുത്തിക്കൊലപ്പെടുത്തി

Crime India News

ഹരിയാനയില്‍ 12 വയസുകാരിയെ ഉപദ്രവിക്കാന്‍ ശ്രമിച്ച യുവാവിനെ തടയാന്‍ ശ്രമിച്ചതിന് 24 കാരനെ കുത്തി കൊലപ്പെടുത്തി. റോത്തക്കിലെ റസിഡന്‍ഷ്യല്‍ കോളനിയിലാണ് സംഭവം. ബോക്‌സറായ കാമേഷിനെയാണ് തിങ്കളാഴ്ച രാത്രി കുത്തികൊലപ്പെടുത്തിയത്. മരിച്ച കാമേഷ് മുമ്പ് മോഡലിങ്ങ്, അഭിനയ രംഗത്തുമുണ്ടായിരുന്നു. തേജ് കോളനിയില്‍ ബന്ധുവിനെ സന്ദര്‍ശിക്കാന്‍ പോകുകയായിരുന്നു കാമേഷ്. ഇതിനിടെ യുവാവ് പെണ്‍കുട്ടിയെ ഉപദ്രവിക്കുന്നത് ശ്രദ്ധയില്‍ പെടുകയും കാമേഷ് യുവാവിനെ താക്കീത് ചെയ്‌യുകയും ചെയ്തു. തൊട്ടുപിന്നാലെ പ്രതി കത്തിയെടുത്ത് കുത്തുകയായിരുന്നു. സംഭവത്തിന്റെ ദൃശ്യങ്ങള്‍ സമീപത്തെ സിസിടിവി ക്യാമറയില്‍ പതിഞ്ഞിട്ടുണ്ട്. ‘കത്തിയെടുത്ത പ്രതി കാമേഷിനെ നിരവധി തവണ കുത്തുകയായിരുന്നു. റോത്തക്കിലെ പി.ജി.ഐ.എം.എസ് ആശുപത്രിയില്‍ പ്രവേശിപ്പിച്ചെങ്കിലും മരിക്കുകയായിരുന്നു’ -റോത്തക്ക് ഡി.എസ്.പി ഖോരഗ്പാല്‍ പറഞ്ഞു. പൊലീസ് കേസ് രജിസ്റ്റര്‍ ചെയ്ത് അന്വേഷണം ആരംഭിച്ചു.