വാസ്‌കോ ഡ ഗാമ: ഐഎസ്എല്ലിൽ ഇന്ന് കേരള ബ്ലാസ്റ്റേഴ്‌സ് – ഈസ്റ്റ് ബംഗാൾ മത്സരം നടക്കും. ഗോവയിൽ വൈകിട്ട് ഏഴരയ്ക്കാണ് കളി നടക്കുക. കഴിഞ്ഞ കളിയിൽ മഞ്ഞപ്പട കരുത്തരായ ഒഡിഷയെ ഒന്നിനെതിരെ രണ്ട് ഗോളിന് കീഴടക്കിയിരുന്നു. നിലവിലെ ഫോമിൽ ബ്ലാസ്റ്റേഴ്സിന് തന്നെയാണ് മുൻ‌തൂക്കം.
അ‍ഡ്രിയൻ ലൂണയുടെ ഫോമാണ് ടീമിന്റെ ബലം. പ്രതിരോധവും മധ്യനിരയും സെറ്റായിക്കഴിഞ്ഞതോടെ ബ്ലാസ്റ്റേഴ്സിന് കാര്യങ്ങൾ എളുപ്പമാവും. അൽബിനോ ഗോമസിന് പരിക്കേറ്റത് കൊണ്ട് പ്രഭ്സുഖൻ ഗില്ലായിരിക്കും ഗോൾവലയം കാക്കുക.
ഈ സീസണിൽ ഈസ്റ്റ് ബംഗാൾ ഇതുവരെ ജയം തൊട്ടിട്ടില്ല. അഞ്ച് കളിയിൽ മൂന്ന് തോൽവിയും രണ്ട് സമനിലയുമാണ് ഫലം. എട്ട് ഗോൾ നേടിയപ്പോൾ 14 ഗോൾ വഴങ്ങിയതാണ് ഈസ്റ്റ് ബംഗാളിന് തിരിച്ചടിയായത്.
കഴിഞ്ഞ സീസണിൽ ബ്ലാസ്റ്റേഴ്‌സും ഈസ്റ്റ് ബംഗാളും ഏറ്റുമുട്ടിയ രണ്ട് കളിയും ഗോൾരഹിത സമനിലയിൽ അവസാനിച്ചിരുന്നു.
